ඉදිරි වසර පහ තුළ ග්රාමීය ජනතාවගේ දුගීභාවය තුරන් කිරීම, ග්රාමීය ජනතාවගේ ආර්ථිකය සහ සමාජයීය තත්ත්වය ඉහල නැංවීම රජයේ ප්රධාන අරමුණක් වන බව ජනාධිපති අනුර කුමාර දිසානායක සදහන් කරයි.
රජයේ එම වැඩපිළිවෙල සාර්ථක කර ගැනීම වෙනුවෙන් රාජ්ය නිලධාරීන්ගේ සහාය අත්යවශ්ය බවත් රාජ්ය නිලධාරින් සතු අත්දැකීම් ඊට මනා පිටිවහලක් වන බවද ජනාධිපති අනුර කුමාර දිසානායක සදහන් කරයි.
රජයේ පරමාර්ථය සහ රාජ්ය සේවය ක්රියාත්මක වන ආකාරය අතර යම් පරතරයක් තිබෙන බවත් රට සංවර්ධනය කරා ගෙන යන රජයේ වැඩපිළිවෙල සාක්ෂාත් කර ගැනීමට නම් රාජ්ය පරිපාලනය මෙතෙක් කටයුතු කළ ආකාරය වෙනස් විය යුතු බවද ජනාධිපතිවරයා සදහන් කරයි.
රටේ වංචා දූෂණ නතර කිරීම රජයේ ප්රමුඛතම කාර්යභාරයක් වන බවත් වංචා සහ දූෂණ හේතුවෙන් රටේ ව්යාපෘති ක්රියාත්මක කිරීමට මෙන්ම අවසන් කිරීමට නොහැකි වී ඇති බවද ජනාධිපතිවරයා සදහන් කරයි.
එසේම රාජ්ය සේවය තුළ දේශපාලන අධිකාරිය වශයෙන් කිසිඳු අත පෙවීමක් සිදු නොකරන බවත් රාජ්ය නිලධාරීන්ට ස්වාධීනව කටයුතු කිරීමට අවස්ථාව සළසා දී තිබෙන බවද ජනාධිපතිවරයා සදහන් කරයි.
රටේ ප්රාදේශීය සංවර්ධනය වෙනුවෙන් රාජ්ය නිලධාරීන්ට සුවිශේෂී කාර්යභාරයක් පැවරී තිබෙන බවත් ජනතා සේවාවන් කප්පාදු කිරීමකින් තොරව රාජ්ය සේවය සදහා කරන අනවශ්ය වියදම් අවම කර ගත යුතු බවද සදහන් කරයි.
ශ්රී ලංකා පරිපාලන සේවා සංගමය සමඟ ජනාධිපති ලේකම් කාර්යාලයේදී පැවති සාකච්ඡාවේදී ජනාධිපති අනුර කුමාර දිසානායක මේ බව සදහන් කරයි.