පළාත් පාලන ආයතනවල බලය පිහිටුවීම සඳහා ඩීල් දැමීමේ කිසිදු වරදක් නොමැති බවත් එය ප්‍රජාතන්ත්‍රවාදයේ කොටසක් බවත් කෘෂිකර්ම, පශූ සම්පත්, ඉඩම් හා වාරිමාර්ග අමාත්‍ය කේ. ඩී. ලාල්කාන්ත පවසයි.
ප්‍රශ්නය – බහුතරය ලැබුණා කිව්වාට ආයතන එකසිය අසූ ගාණකම බලය පිහිටුවීම සම්බන්ධ ප්‍රශ්නයක් තියෙනවා. ඔබතුමන්ලා ඒකට කරන්නෙ මොකක්ද?
“ඕකට හොඳම දේ තමයි බලය පිහිටෙව්වාට පස්සෙ බලන එක. බලය පිහිටෙව්වාට පස්සෙ බලන්නකො කොහොමද කරලා තියෙන්නෙ කියලා වැඩේ. අපි බලය පිහිටුවනවා.”
ප්‍රශ්නය – කොළඹ නගර සභාවේ එහෙම ලොකු ලොකු ඩීල් යනවායි කියලාත් මුජිබර් රහුමාන් මන්ත්‍රීවරයා චෝදනා කරනවා. අපි දැක්කා පහුගියදා ජනාධිපතිතුමා එක්කත් සාකච්ඡාවක් තිබුණා. ඇත්තටම එහෙම වෙනවාද?
“වැඩිම මන්ත්‍රී සංඛ්‍යාව ගත්ත පක්ෂයට ඒ පළාත් පාලන ආයතනවල බලය පිහිටුවීමේ ප්‍රජාතන්ත්‍රවාදී අයිතියක් තියෙනවා. ඒක තමයි බලවත්ම පැත්ත. ඉතින් පරාජිත වෙච්ච අය එකතුවෙලා බලය පිහිටුවන්න දරන උත්සාහය ප්‍රජාතන්ත්‍රවාදී නැහැ. වැඩිම මන්ත්‍රී සංඛ්‍යාවක් ගත්ත පක්ෂය බලය පිහිටුවන්න වෙනත් අයත් සමග සාකච්ඡා කරන එකේ කිසි වැරැද්දක් නැහැ. ඒකට නම මොනවා දැම්මත් – ඩීල් හරි, වෙන මොන නම දැම්මත් ඒකෙ කිසි වැරැද්දක් නෑ. ඒක අනිවාර්යයි, ප්‍රජාතන්ත්‍රවාදී දේශපාලනයේ අනිවාර්යය කාර්යයක් ඒක.”
ඇමති කේ. ඩී. ලාල්කාන්ත මේ බව පැවසුවේ ඊයේ (22) මාධ්‍ය නැඟී ප්‍රශ්නවලට පිළිතුරු ලබා දෙමිනි.
