ජනාධිපති මාධ්‍ය අංශය පවසන්නේ ජපාන රජයේ ආධාර යටතේ මෙරට ක්‍රියාත්මක දැනට අතරමඟ නැවතී ඇති ව්‍යාපෘති 11 ක වැඩ කටයුතු නැවත කඩිනමින් ආරම්භ කරන බව ජපාන තානාපති මිසුකොෂි හිදෙයි කි මහතා එකඟවූ බවයි.
ඒ අනුව මහනුවර නගරයේ ජල කළමණාකරණ ව්‍යාපෘතිය, බණ්ඩාරණායක ජාත්‍යන්තර ගුවන්තොටු පොළ සංවර්ධන ව්‍යාපෘතියේ දෙවන අදියර, භෞමික රූපවාහිනී විකාශන ඩිජිටල්කරණ ව්‍යාපෘතිය, ජාතික සම්ප්‍රේෂණ සහ ඛෙදා හැරීමේ ජාල සංර්වර්ධන ව්‍යාපෘතිය, අනුරාපුර උතුර ජල සම්පාදන ව්‍යාපෘතියේ 2 වන අදියර, ග්‍රාමීය යටිතල පහසුකම් සංවර්ධන ව්‍යාපෘතිය, කළු ගඟ ජල සම්පාදන ව්‍යාපෘතිය සහ සෞඛ්‍ය හා වෛද්‍ය සේවා වැඩි දියුණු කිරීමේ ව්‍යාපෘතිය කඩිනමින් ආරම්භ කිරීමට නියමිතයි.
ඊට අමතරව ජපාන ආධාර යටතේ මෙරට ක්‍රියාත්මක දැනට අවසන් අදියරේ පවතින හබරණ – වේයන්ගොඩ සම්ප්‍රේෂණ මාර්ග ව්‍යාපෘතිය සහ අනුරාධපුර උතුර ජල සම්පාදන ව්‍යාපෘතියේ පළමු අදියර කඩිනමින් නිම කිරීම මෙන්ම වැඩ අවසන්ව ඇති කැළණි ගහ නව පාලම් ඉදි කිරීමේ ව්‍යාපෘතියට අදාළ ගෙවීම් සිදු කිරීම ද මීට ඇතුළත් බව ජපාන තානාපති මිසුකොෂි හිදෙයිකි වැඩිදුරටත් පවසා ඇත.
ජනාධිපති කාර්‍යාලයේදී නව ජනාධිපති ලේකම් ආචාර්ය නන්දික සනත් කුමානායක සමඟ පැවැත්වූ සාකච්ඡාවේදී තානාපතිවරයා මේ බව සඳහන් කර ඇත.
එහිදී ජපාන තානාපතිවරයා අවධාරණය කර ඇත්තේ අනුර කුමාර දිසානායක ඇතුළු නව රජයේ ප්‍රමුඛ කාර්යයක් වන දූෂණ සහ අක්‍රමිකතා පිටු දැකීමේ වැඩපිළිවෙළට ජපාන රජයේ පූර්ණ සහයෝගය ලබා දෙන බවත් ශ්‍රී ලංකාව සමඟ තවදුරටත් සමීපව කටයුතු කිරීමට ජපානය සුදානම් බවත්ය.
